Atkvæðagreiðsla á kjördag

Kjörstaðir

Kjörstaðir eru auglýstir af sveitarstjórn eða yfirkjörstjórn á þann hátt sem venja er að birta opinberar auglýsingar á hverjum stað.

Upphaf kjörfundar

Kjörfund skal setja á tímabilinu klukkan 9–12 árdegis. Skal upphaf kjörfundar auglýst fyrirfram af sveitarstjórn eða yfirkjörstjórn.

Lok kjörfundar

Kjörfundur skal almennt standa í a.m.k. átta klukkustundir og ekki má slíta kjörfundi fyrr en hálf klukkustund er liðin frá því að kjósandi gaf sig síðast fram. Heimilt er að ljúka kjörfundi ef allir sem eru á kjörskrá hafa greitt atkvæði. Einnig er heimilt að ljúka kjörfundi eftir fimm klukkustundir ef öll kjörstjórnin og umboðsmenn eru sammála um það, enda sé liðin hálf klukkustund frá því að kjósandi gaf sig síðast fram. Kjörfundi skal vera lokið eigi síðar en klukkan 22.

Kosningaleiðbeiningar

Félagsmálaráðuneytið gefur út kosningaleiðbeiningar og skulu þær hanga uppi í kjörfundarstofu og annars staðar á kjörstað á áberandi stað.

Dyravarsla

Dyravörður skipaður af kjörstjórn sér um að hleypa kjósendum inn í kjörfundarstofu. Ef ágreiningur er um í hvaða röð kjósendur komast að ræður röðin á kjörskrá, þannig að dyravörður hleypir þeim fyrr inn sem framar stendur á kjörskrá af þeim sem gefa sig fram.

Álit félagsmálaráðuneytisins frá 8. apríl 1998 fjallar um hæfi dyravarðar.

8. apríl 1998 - Vestmannaeyjabær - Hæfi kjörstjórnarmanna og dyravarðar.

Í úrskurði félagsmálaráðuneytisins frá 8. júlí 1998 varðandi sveitarstjórnarkosningar í Arnarneshreppi var m.a. fjallað um að þar var ekki skipaður dyravörður.

8. júlí 1998 - Arnarneshreppur - Úrskurður um sveitarstjórnarkosningar 23. maí 1998.