Leiðbeiningar fyrir kjósendur

Kjósandi gerir grein fyrir sér

Kjósandi skal framvísa kennivottorði eða nafnskírteini, eða gera grein fyrir sér á annan fullnægjandi hátt að mati kjörstjórnar.

Með kennivottorði er átt við önnur persónuskilríki, svo sem ökuskírteini, vegabréf eða greiðslukort með mynd.

Þegar kjósandi hefur þannig gert grein fyrir sér fær hann afhentan einn kjörseðil.

Engum manni, sem á kjörskrá stendur, má kjörstjórnin meina að greiða atkvæði nema hann hafi afsalað sér atkvæðisrétti í þeirri kjördeild og greitt atkvæði annars staðar.

Engum manni, sem ekki stendur á kjörskrá, má kjörstjórn leyfa að greiða atkvæði nema hann sanni með vottorði að nafn hans standi á kjörskrá í annarri kjördeild innan sama sveitarfélags og hafi afsalað sér kosningarrétti þar. Vottorð um það skal hafa verið gefið út af undirkjörstjórn þeirrar kjördeildar. Vottorð er einnig gilt ef það er undirritað af oddvita eða framkvæmdastjóra sveitarstjórnar fyrir hennar hönd.

Í kjörklefa

Þegar kjósandi hefur tekið við kjörseðlinum fer hann með seðilinn inn í kjörklefann.

Í kjörklefanum skal vera borð og á því skulu vera ekki færri en tvö venjuleg dökk ritblý nægilega vel ydd.

Í kjörklefa skal einnig vera spjald jafnstórt kjörseðli með upphleyptum listabókstöfum og blindraletri, með glugga framan við hvern staf og vasa á bakhlið þannig að blindir geti gegnum gluggann sett kross framan við þann lista er þeir gefa atkvæði sitt og á þann hátt kosið í einrúmi og án aðstoðar.

Í úrskurði félagsmálaráðuneytisins frá 30. október 1998 varðandi sveitarstjórnarkosningar í Austur-Eyjafjallahreppi kemur fram að það veldur ekki ógildi kosninga þó blindraspjald vanti, ef sýnt er fram á að það hafi ekki haft áhrif á úrslit kosninga og það hafi ekki hindrað einstaklinga í að nýta sinn kosningarrétt.

30. október 1998 - Austur-Eyjafjallahreppur - Úrskurður um sveitarstjórnarkosningar 23. maí 1998.

Meðferð kjósanda á kjörseðli

Atkvæðagreiðsla við bundnar hlutfallskosningar

Kjósandi greiðir atkvæði á þann hátt að hann markar með ritblýi kross á kjörseðilinn fyrir framan bókstaf þess lista sem hann vill kjósa af þeim sem í kjöri eru.

Vilji kjósandi breyta nafnaröð á lista þeim er hann kýs setur hann tölustafinn 1 fyrir framan það nafn er hann vill hafa efst, töluna 2 fyrir framan það nafn sem hann vill hafa annað í röðinni, töluna 3 fyrir framan það nafn sem hann vill hafa það þriðja o.s.frv., að svo miklu leyti sem hann vill breyta til.

Ef kjósandi vill hafna frambjóðanda á þeim lista sem hann kýs strikar hann yfir nafn hans.

Kjósandi gætir þess, hvernig sem hann kýs, að gera engin merki á kjörseðilinn fram yfir það sem hér segir.

Kjósandi má ekki hagga neitt við listum sem hann kýs ekki, hvorki strika yfir nöfn á þeim né breyta á þeim nafnaröð.

Atkvæðagreiðsla við óbundnar kosningar

Atkvæðagreiðsla fer fram með þeim hætti að kjósandi skrifar (með prentstöfum) í kjörklefa á kjörseðilinn fullt nafn og heimilisfang aðalmanna á þann hluta kjörseðilsins sem ætlaður er fyrir kjör aðalmanna.

Á þann hluta seðilsins sem ætlaður er fyrir kjör varamanna skal hann rita (með prentstöfum) nöfn varamanna og heimilisföng þeirra í þeirri röð sem hann kýs að þeir taki sæti allt að þeirri tölu sem kjósa á.

Aðstoð við kjósanda

Ef kjósandi skýrir kjörstjórn frá því að hann sé ekki fær um að kjósa á fyrirskipaðan hátt sakir sjónleysis eða þess að honum sé hönd ónothæf skal sá úr kjörstjórninni er kjósandi nefnir til veita honum aðstoð til þess í kjörklefanum, enda er sá sem aðstoðina veitir bundinn þagnarheiti um að segja ekki frá því sem þeim fer þar á milli.

Réttur til að fá nýjan kjörseðil

Láti kjósandi sjá hvað á seðli hans stendur er seðillinn ónýtur og má ekki leggja hann í atkvæðakassann. Ef kjósanda verður þetta á eða ef hann setur skakkt kjörmerki á seðil eða seðill krotast hjá honum af vangá á hann rétt á að fá nýjan kjörseðil. Skal hann þá afhenda kjörstjórninni hinn fyrri seðil.

Kjörkassi

Þegar kjósandi hefur gengið frá seðlinum inni í kjörklefanum samkvæmt framansögðu brýtur hann seðilinn í sama brot og hann var í þegar hann tók við honum, svo að letrið snúi inn, gengur út úr klefanum og að kjörborðinu, stingur sjálfur seðlinum í atkvæðakassann gegnum rifuna á lokinu og gætir þess að enginn sjái hvað á seðlinum er. Þess skal hann gæta jafnvel þótt hann skili auðum seðli.

Þegar kjósandi hefur látið seðilinn í atkvæðakassann víkur hann út úr kjörfundarstofunni.